راپۆرتێكی نوسینگەی بەڕێوەبەری هەواڵگری نیشتمانی ئەمریكا لەسەر سەرەتای سەرهەڵدانی ڤایرۆسی كۆرۆنا ئاشكرا كرا و تێیدا هاتووە، كۆرۆنا وەك چەكێكی بایەلۆجی دروست نەكراوە.
بەپێی راپۆرتێكە كە تێیدا هەڵسەنگاندنی دەزگا هەواڵگریەكانی ئەمریكای بۆ ڤایرۆسی كۆرۆنای تێدایە، ڤایرۆسەكە وەك چەكێكی بایەلۆجی دروست نەكراوە، ئەوەش سەرەڕای ئەوەی كە “پەیمانگای ووهان بۆ زانستی ڤایرۆسەكان” پێشتر چەند ڤایرۆسێكی هاوشێوەی ڤایرۆسی “سارس”ی دروست كردووە، بەڵام زانیاریەكان پاڵپشتی ئەوە ناكەن كە كۆرۆنا لەلایەن هەمان پەیمانگاوە بۆماوەییەكەی گۆڕابێت.
ئەوەش هاتووە، بەپێی هەڵسەنگاندنەكانی چوار دەزگای هەواڵگری ڤایرۆسەكە سەرەتا لە گیاندارانەوە گواستراوەتەوە بۆ مرۆڤ، بەڵام بەپێی هەڵسەنگاندنی دەزگایەكی تری هەواڵگری كە متمانەیەكی مامناوەندی هەیە، یەكەم توشبووی كۆرۆنا پەیوەندی بە پەیمانگاكەی ووهانەوە هەیە.
لە كۆتاییەكانی ساڵی 2019 ڤایرۆسی كۆرۆنا لە شاری ووهانی چین دەركەوت و دواتر بە جیهاندا بڵاوبوویەوە، چەندین جاریش ئەمریكا چینی بە دروست كردنی ڤایرۆسەكە تۆمەتبار كرد، بەڵام ئەو وڵاتە بە هەموو شێوەیەك ئەو تۆمەتانە رەتدەكاتەوە.
