د. شاناز نەقشبەندی وتەبێژی بەڕێوەبەرایەتی گشتی تەندروستی هەڵەبجە هۆشداری دەدات لە بەرزبوونەوەی ژمارەی توشبووانی كۆرۆنا لە پارێزگاكە و داوا لە هاوڵاتیان دەكات بچن ڤاكسین وەربگرن.
د. شاناز نەقشبەندی بە دەنگی ئەمریكای وتووە، ئامارەكانی توشبوون و گیان لەدەستدان بە ڤایرۆسی كۆرۆنا گەشتووەتە لوتكە، رۆژانە ئامارەكان روویان لەبەرز بوونەوەیە و رێژەی داغڵ بوون زۆر زیادی كردووە، لە ئێستادا نەخۆشخانەی وەفا لە لێواری پڕبوندایە لە نەخۆش.
رونیشیكردووەتەوە، لە كۆی زیاتر لە 120 هەزار دانیشتووی پارێزگاكە تاوەكو ئێستا نزیكەی 20 هەزار هاوڵاتی ڤاكسینیان وەرگرتووە و ئەوەش رێژەیەكی كەمە، لە ئێستادا لە رێگەی تیمە گەڕۆكەكانیانەوە دەیانەوێت لە مامۆستایانەوە دەست پێبكەن و لە قوتابخانەكانی خۆیانەوە ڤاكسینیان پێبدەن.
وتەبێژی تەندروستی هەڵەبجە ئەوەشی وتووە، پێویستیان بە كارگەیەكی ئۆكسجینە بۆ نەخۆشخانەی وەفا و رۆژانە بەهۆی نەبوونی كارگەی ئۆكسجین زۆرجار پەنا دەبەنە بەر پارێزگای سلێمانی بەتایبەت بۆ پڕكردنەوەی بوتڵەكان.
