دوای شەهید كردنی دوو پێشمەرگە لە لایەن رێكخراوی داعشەوە، وەزارەتی پێشمەرگە لە راگەیەندراوێكدا ئاماژە بەوە دەدات، چەندین جار هۆشدارییان داوە لە خۆڕێكخستنەوەی ئەو رێكخراوە.
شەوی رابردوو چەكدارانی داعش لە سنوری شارۆچكەی پردێ هێرشیان كردە سەر لیوای 10ی پیادەی پێشمەرگە و بەهۆی هێرشەكەوە دوو پێشمەرگەی ئەو لیوایە شەهید بوون.
لای خۆیەوە وەزارەتی پێشمەرگە لە راگەیەندراوێكدا بڵاویكردووەتەوە، وەك هەمیشە هێزی گیانفیدای پێشمەرگە لە ئامادەسازی و ئامادەباشی تەواودایە بۆ بەرگریكردن لەخاك و خەڵكی كوردستان.
ئەوەش هاتووە، لەكاتێكدا چەندین جار هۆشداریمان داوە لەسەر خۆڕێكخستنەوەی شانە نوستوەكانی داعش و سەرهەڵدانەوەیان، بەم كارە چەپەڵ و ترسنۆكانەشیان ناگەنە هیچ ئامانجێك و بەبازووی هێزی پێشمەرگە ئەفسانەی سەرهەڵدانەوەشیان پوچەڵ دەكەینەوە، ئەمەش بە هاوكاری و هەماهەنگی لەگەڵ هێزەكانی ئاسایشی ناوخۆ و سوپای عیراق و هێزەكانی هاوپەیمانی نێوەدەوڵەتی.
