جۆ بایدن سەرۆكی ولایەتە یەكگرتووەكانی ئەمریكا دەڵێت، هۆكاری گرانبوونی نرخی نەوت و بەنزین رێكخراوی ئۆپێكە، چونكە رەتیدەكاتەوە بڕی هەناردە زیاد بكات.
ئاژانسی رۆیتەرز بڵاویكردووەتەوە، جۆ بایدن لە كۆنفرانسی لوتكەی كەشوهەوا لە شاری گلاسكۆ لە سكۆتلەندا لە وتەیەكدا وتی، رێكخراوی ئۆپێك رەتیدەكاتەوە هەناردەی نەوتی خاو بۆ بازاڕەكان زیاد بكات، ئەوەش هۆكاری بەرزبوونەوەی نرخی نەوت و بەنزینە.
ئاماژەی بەوەشداوە، هەروەها بەهۆی ئەوەی زیاد كردنی بەرهەمی نەوت بەشێوەیەكی لەسەرخۆ دەچێتە پێشەوە، ئەوەش بووەتە هۆی بەرزبوونەوەی هەڵاوسان.
لە سەرەتای ئەمساڵەوە تاوەكو ئێستا نرخی نەوتی خاوی برێنت 60% زیادی كردووە و لەماوەی رابردودا نرخی یەك بەرمیل گەیشتە نزیكەی 87 دۆلار، ئەوەش بەرزترین ئاستی بوو لە ماوەی سێ ساڵی رابردودا، لە ئێستاشدا یەك بەرمیل لە سەروو 83 دۆلارەوە مامەڵەی پێوە دەكرێت.
