قوتەیبە ئیبراهیم جبوری ئەندامی هاوپەیمانی “عزم” داوا لە بەرهەم ساڵح سەرۆك كۆماری عێراق دەكات، دەستوەردان بكات و كاری كۆمیسیۆنی باڵای هەڵبژاردنەكان بوەستێنێت، چونكە پرۆسەی هەڵبژاردن بووەتە شانۆگەری و جێگەی گاڵتەجاڕیی شەقامی عێراقی و كۆمەڵگەی نێودەوڵەتی.
ئیبراهیم جبوری لە بەیاننامەیەكدا بڵاویكردووەتەوە، جیاكردنەوەی دەستی ئەو وێستگانەی تانەیان لەسەر بووە چەندین تێبینی لەسەرە، گرنگترینیشیان بەراورد نەكردنی بە ئەنجامی ئەلكترۆنی، هەروەها چەندین كەسایەتی دەسەڵاتدار لە نێو تیمەكانی جیاكردنەوەی دەستیدا بوون و هیچ ناسنامەیەكیشیان پێ نەبووە.
باسی لەوەش كردووە، بە هیچ شێوەیەك بەراوردی ژمارەی قفڵەكانی سەر سندوقەكان نەكراوە و كۆمسیۆن چۆن دەتوانێت دڵنیا بێت ئەو سندوقانەی جیا كراونەتەوە بە دەست، هەمان ئەو سندوقانەن كە تانەیان لێدراوە.
جبوری داوا لە بەرهەم ساڵح سەرۆك كۆمار دەكات بەهۆی ئەوەی پارێزەری دەستورە، دەستوەردان بكات و كاری كۆمیسیۆنی هەڵبژاردنەكان رابگرێت، چونكە بووەتە هۆی ئەوەی پرۆسەی هەڵبژاردن ببێتە شانۆگەرییەك و جێگەی گاڵتەجاڕیی شەقامی عێراقی و كۆمەڵگەی نێودەوڵەتی، داواش لە كوتلە سیاسیەكان دەكات هەڵوێستی خۆیان لەسەر دزینی دەنگەكانیان بە رۆژی رووناك دەرببڕن.
