وەزارەتی بازرگانی و پیشەسازی عیراق هاوكاری بۆ زیانلێكەوتوانی لافاوەكەی هەولێر دەنێرێت و لەرێگەی وەزارەتی بازرگانی هەرێمەوە بەسەریاندا دابەشدەكرێت.
لە راگەیەنراوێكدا كە كۆپیەكی دەست رادیۆی نەوا كەوتوە، نەوزاد شێخ كامیل بەڕێوەبەری گشتی بازرگانی رایگەیاندوە: لەچوارچێوەی ئەو هەوڵانەی وەزارەتی بازرگانی و پیشەسازی داویەتی بۆ بە هاناوەچونی زیانلێكەوتوانی لافاوەكەی رابردوی شاری هەولێر، دوای گفتوگۆی وەزارەتی بازرگانی و پیشەسازی هەرێمی كوردستان و وەزارەتی بازرگانی حكومەتی ناوەند، وەزارەتی بازرگانی عیراق ئامادەیی دەربڕی كە سەبەتە خۆراك بۆ 550 خێزان بنێرێت كە ماڵ و كەرەستەكانیان بەر لافاوەكە كەوتووە.
هەر لە راگەیەنراوەكەدا بەڕێوەبەری گشتی بازرگانی هەرێم رایگەیاندوە، ئەو بەشەخۆراكە گەیشتۆتە هەرێمی كوردستان و لە داهاتویەكی نزیكدا بەهاوكاری پارێزگاری هەولێرو رێكخراوی خێراخوازی دەزگای بارزانی دەستبەدابەشكردنی دەكرێت.
