وەزارەتی نەوتی عیراق ئاشكرای كرد، لە مانگی رابردودا بڕی هەناردەی نەوتی عیراق 5% زیادی كردووە و كۆی گشتی داهاتیش لەو مانگەدا 7 ملیار و 590 ملیۆن دۆلار بووە.
وەزارەتی نەوتی عیراق لە بەیاننامەیەكدا بڵاویكردووەتەوە، لە مانگی تشرینی دووەمدا هەناردەی نەوتی عیراق 5% زیادی كردووە ئەوەش دوای ئەوەی رێكخراوی ئۆپێك رۆژانە 400 هەزار بەرمیل هەناردەی زیاد كرد، بەوەش هەناردەی رۆژانەی عیراق گەیشتووەتە 3 ملیۆن و 273 هەزار بەرمیل لە رۆژێكدا (جگە لە هەرێمی كوردستان).
رونیشكراوەتەوە، بەو پێیەش تێكڕای گشتی پشكی عیراق لە هەمان مانگدا گەیشتووەتە 4 ملیۆن و 193 هەزار بەرمیلی رۆژانە هەروەها لەم مانگەشدا بەرز دەبێتەوە بۆ 4 ملیۆن و 237 هەزار بەرمیل.
وەزارەتی نەوتی عیراق جەختی لەوەش كردووەتەوە، كۆی گشتی داهاتی نەوت لە مانگی رابردودا 7 ملیار و 590 ملیۆن دۆلار بووە و تێكڕای نرخی یەك بەرمیل 77.3 دۆلار بووە، لەكاتێكدا مانگی پێشتر داهات 7 ملیار و 666 ملیۆن دۆلار بووە.
