بەڕێوەبەرایەتی گشتی چاودێری و گەشەپێدانی كۆمەڵایەتی لە سلێمانی ئاگاداری خەڵك دەكاتەوە لەوەی، چەند كەسێك بەناوی مامەڵە و تەرخان كردنی موچە و هاوكاری كەمئەندامان و چاودێری خێزانیی بەڵێنی درۆ بە خەڵك دەدەن و پارەیان لێوەردەگرن، لەكاتێكدا لە هیچ رێگەیەكەوە هیچ جۆرە موچە و هاوكارییەكی نییە.
بەڕێوەبەرایەتییەكە بڵاویكردووەتەوە، كەسێك یاخود زیاتر لە شاری سلێمانی بەناوی مامەڵە و تەرخان كردنی موچە و هاوكاری كەمئەندامان و چاودێریی خێزان سودی لە دۆخی خراپی دارایی خەڵك و سادەیی هەندێك لە هاوڵاتیان بینیوە و بە بەڵێنی درۆ و چەواشە پارە لە خەڵكی دەكێشێتەوە.
ئاماژە بەوەشدراوە، هاوڵاتیان ئاگادار دەكەنەوە بۆ دەستكەوتنی زانیاریی یان ڕاییكردنی هەرجۆرە مامەڵەیەك بە هیچ جۆرێك فریوی كەس نەخۆن و راستەوخۆ پەیوەندی بە فەرمانگەكانمانەوە بكەن و لە راستی و دروستی هەر قسە و قسەڵۆكێك بكۆڵنەوە.
بەڕێوەبەرایەتی گشتی چاودێری و گەشەپێدانی كۆمەڵایەتی لە سلێمانی هێمای بۆ ئەوەش كردووە، بەهیچ جۆرێك لە هیچ رێگەیەكەوە هیچ جۆرە موچە و هاوكارییەكی كۆمەڵایەتی بەناوی چاودێریی خێزان یان كەمئەندانەوە بۆ ماوەی هەشت ساڵە بۆ هیچ كەس نەكراوە و بەهۆی قەیرانی داراییەوە هەموو جۆرە تەرخانكردنێك راگیراوە.
