مستەفا كازمی سەرۆك وەزیرانی عیراق بە یاوەری شاندێك گەیشتە شاری هەولێر و لەلایەن مەسرور بارزانی وەزیرانی هەرێم پێشوازی لێكرا و لە كۆبوونەوەیەكدا گفتوگۆ لەسەر دوایین پێشهات و گۆڕانكارییەكان كرا.
سەرلەبەیانی ئەمڕۆ چوارشەممە، مستەفا كازمی بە یاوەری شاندێكی سەربازی گەیشتە شاری هەولێر و لەلایەن مەسرور بارزانییەوە پێشوازی لێكرا و هەردولا كۆبوونەوەیەكیان ئەنجامدا.
سەبارەت بە سەردانەكە سەرۆكایەتی حكومەتی هەرێم لە راگەیەندراوێكدا بڵاویكردووەتەوە، لە كۆبوونەوەی هەردوو سەرۆك وەزیراندا باس لە دوایین پێشهات و گۆڕانكارییەكانی عیراق دوای پرۆسەی هەڵبژاردن تاووتوێ كران، هەروەها جەخت لە گرنگی سەقامگیربونی دۆخی عیراق و گەشەپێدانی بارودۆخی ئابوری و چارەسەركردنی بنەڕەتی كێشە هەڵپەسێردراوەكانی نێوان هەردولا كرا.
هەر بەپێی راگەیەندراوەكە، لە تەوەرێكی دیكەی كۆبونەوەكەدا گفتوگۆ لەبارەی هێرش و پەلامارەكانی ئەم دواییەی داعش و گرنگی چڕكردنەوەی هەوڵ و تواناكان و بەهێزكردنی هەماهەنگی نێوان پێشمەرگە و سوپای عیراق كرا لە پێناو كۆتاییهێنان بە هەڕەشە و مەترسییەكانی داعش.
