بەهمەن عەبدولقادر وتەبێژی بەنزینخانەكانی سلێمانی دەڵێت، حكومەتی عیراق رەوانەكردنی بەنزینی راگرتوە و لەبەرامبەریشدا، وەزارەتی سامانە سروشتیەكان بەڵێنیداوە بەنزینی عیراقی بۆ شۆفێران دابین بكات.
بەهمەن عەبدولقادر لە لێدوانێكی رۆژنامەوانیدا وتویەتی، رەوانەكردنی بەنزیكی عیراقی بۆ هەرێمی كوردستان راگیراوە و هۆكارەكەشی روون نییە، پێدەچێت كێشەی تەكنیكی بێت یاخود بەرهەمهێنانی بەنزین كەمی كردبێت.
باسی لەوەش كردووە، لای خۆیەوە وەزارەتی سامانە سروشتیەكان و بەڕێوەبەرایەتی نەوت و كانزاكانی سلێمانی، بەڵێنیانداوە ئەو بڕە بەنزینە پڕبكەنەوە كە پێشتر حكومەتی عیراق ناردویەتی، بۆ ئەوەش ژمارەیەك بەنزینخانەیان دیاریكردوە.
وتەبێژی بەنزینخانەكانی سلێمانی جەختی لەوەش كردووەتەوە، راگرتنی بەنزین هیچ پەیوەندییەكی بەوەوە نییە پارە نەگەڕێندرابێتەوە بەغدا، تەنانەت هەندێك جار پارەكەش پێشتر دەنێرن.
