وەزارەتی دەرەوەی عیراق بڵاویكردەوە، تاوەكو ئێستا زیاتر لە 3 هەزار و 500 هاوڵاتی عیراقی لە سنورەكانی بیلاڕوسیا و پۆڵەنداوە گەڕێندراونەتەوە و 383 پاسپۆرتیش بۆ ئەو كەسانە دەركراوە كە پاسپۆرتەكانیان ونكردووە.
ئەحمەد سەحاف وتەبێژی وەزارەتی دەرەوەی عیراق لە بەیاننامەیەكدا رایگەیاندووە، هەوڵەكانیان بەردەوامن بۆ گەڕانەوەی ئەو كۆچەرە عیراقیانەی لە سنورەكانی بیلاڕوسیا و پۆڵەندان و دەیانەوێت ئارەزوومەندانە بگەڕێنەوە.
باسی لەوەش كردووە، باڵیۆزخانەكانی عیراق لە مۆسكۆ و وارشۆ هەوڵی بێوێنە دەدەن بۆ پێشكەش كردنی هاوكاری مرۆیی و تۆمار كردنی ناوی ئەو كەسانەی دەیانەوێت بگەڕێنەوە.
وتەبێژی وەزارەتی دەرەوەی عیراق جەختی لەوەش كردووەتەوە، تاوەكو ئێستا 9 گەشت ئەنجام دراوە و 3 هەزار و 556 عیراقی گەڕێندراونەتەوە، هەروەها 383 پاسپۆرت دراوەتە ئەو كەسانەی پاسپۆرتەكانیان ونكردووە لە بیلاڕوسیا، لیتوانیا، لاتیڤیا و پۆڵەندا.
