ئالان حەمەسەعید وەزیری پەروەردەی حكومەتی هەرێمی كوردستان سەبارەت بە داواكاریەكان بۆ داوای لێبوردن بەهۆی سوكایەتی كردن بە پێغەمبەری ئیسلامی لە پرۆگرامی خوێندنی پۆلی 10ی ئامادەیی دەڵێت، لەسەر كارێك كە بەبڕیاری ئەو نەكراوە داوای لێبوردن ناكات.
ئالان حەمەسەعید بە رۆژنامەنوسانی وت، ئەو بابەتەی ناو پرۆگرامی 10ی ئامادەیی لەساڵی 2007ەوە هەیە و نازانێت بۆ ئێستا ورژوێنراوە، لەئازاری 2021 بڕیاری پێداچونەوەیان داوە بە پڕۆگرامی خوێندن ئەوەش پلەبەندی و كاری زانستی دەوێت.
جەختی لەوەش كردووەتەوە، لە مانگی 10ی ئەمساڵ لیژنە لەسەر كتێبی كوردی پۆلی 10 دانیشتووە و پێداچونەوە كراوە و تەنها بەشێكی كەمی ماوە، بۆ ئەوەی ساڵی ئایندە كتێبێكی دیكە بخوێندرێت.
سەبارەت بە داواكاریەكان بۆ داوای لێبوردن وەزیری پەروەردە جەختی لەوە كردووەتەوە، ئەوە بەرپرسیارێتی ئەو نییە بەڵام بەرپرسیارێتی ئەوەیان لەسەر بووە چاكی بكەن و ئەوەشیان كرد، داوای لێبوردن لە حزبی سیاسی ناكات لەكاتێكدا ئەو كارە لەسەردەمی ئەو و بە بڕیاری ئەو نەكراوە.
