بەهۆی ئەوەی هاوسەرە گەنجە كۆچەرە عیراقی و سورییەكانی لە یەكتر جیاكردووەتەوە، دادگای دانیمارك سزای زیندانی بەسەر ژنە وەزیرێكی پێشوودا سەپاند.
رۆژنامەی واشنتن پۆست بڵاویكردووەتەوە، دادگای دانیماركی لە دادگایی كردنێكی مێژوویدا سزای زیندانی بەسەر “ئینگەر ستویبرێگ” وەزیری پێشووی كۆچی ئەو وڵاتە كە لە ساڵانی 2015 بۆ 2019 وەزیر بووە سەپاند، دادگا پێی وایە ناوبراو رێكەوتنی ئەوروپی بۆ مافەكانی مرۆڤی پێشێل كردووە و فەرمانی كردووە هاوسەرە گەنجەكان لە كەمپەكاندا لەیەكتر جیابكرێنەوە، ئەوەش سەرەڕای ئەوەی هەندێكیان منداڵیشیان هەبووە.
لای خۆیەوە ئینگەر ئاماژەی بەوەداوە، سەری لە بڕیارەكە سوڕماوە چونكە ئەو كارەی كردوویەتی بۆ روبەڕوبوونەوەی دیاردەی هاوسەرگیری منداڵان بووە،
پێشتریش لە چاوپێكەوتنێكی تەلەفزیۆنیدا وتویەتی “پێویستە ئەو هاوسەرانە جیابكرێنەوە، چونكە ناتوانێت هاوسەرگیری بە زۆر لە ناوەندەكانی پەنابەران قبوڵ بكات”.
ئینگەر بە هەڵوێستە توندەكانی دژی كۆچ ناسراوە و لە سەردەمی خۆیدا چەندین رێوشوێنی توندی دژی كۆچەران گرتووەتە بەر، بەپێی زانیاریەكانیش، سزای زیندانییەكەی لە 6 مانگ كەمترە بۆیە لە ماڵەكەی خۆیدا بارمتەدەبێت و لەژێر چاودێری ئەلكترۆنیدا دەبێت.
