رزگار حاجی حەمە ئەندامی مەكتەبی سیاسی یەكێتی رایگەیاند، تاوەكو ئێستا بەرهەم ساڵح تاكە كاندیدی حزبەكەیانە بۆ پۆستی سەرۆككۆمار، بوونی ئەو پۆستە لای یەكێتی تەنانەت رەزامەندی شیعە و سونەشی لەسەر بووە.
رزگار حاجی لە گفتوگۆیەكی تەلەفزیۆنیدا وتویەتی، كاتێك دیارینەكراوە بۆ ئەوەی لە كۆبونەوەی مەكتەبی سیاسی كەسێك وەكو بەربژێر بۆ سەرۆكایەتی كۆمار دیاری بكەن، تاوەكو ئەم ساتە تاكە بەربژێری پێشنیازكراوی یەكێتی بۆ ئەو پۆستە دكتۆر بەرهەم ساڵحە.
رونیشیكردووەتەوە، لە رابردودا بە كۆمەڵێك لێكتێگەیشتن لە نێوان یەكێتی و پارتی ئەو پۆستە لای یەكێتی بووە، هاوكات رەزامەندی لایەنە سیاسییەكانی عیراقیشی لەسەر بووە، هەم لایەنی شیعی و هەم لایەنی سوننی.
ماوەی چەندین ساڵە پۆستی سەرۆك كۆماری عیراق لای یەكێتی نیشتمانی كوردستان بووە و چەندین جاریش پارتی هەوڵی بەدەستهێنانی ئەو پۆستەی داوە، ئێستا ئەو حزبە جەخت لەوە دەكاتەوە، كە پۆستەكە لەسەر هیچ حزبێك تاپۆ نەكراوە.