عەبدولستار مەجید سەرۆكی فراكسیۆنی كۆمەڵ لە پەرلەمانی كوردستان دەڵێت، 200 ملیار دینار لە داهاتی ناوخۆی مانگی رابردوو دیارنەماوە و مەترسی بۆ موچەی فەرمانبەران دروستبووە، داوا دەكەن حكومەت دەستلەكاربكێشێتەوە خۆ دونیا كاولنابێت، ناتوانن حوكمداریی بكەن با وازی لێبێنن.
عەبدولستار مەجید لە كۆنگرەیەكی رۆژنامەوانیدا وتی، حكومەت فێری دزینی پرۆژە بوە كە خویەكی زۆر خراپە، هەر پرۆژەیەك دەدەینە پەرلەمان حكومەت دەیدزێت و دەڵێت من پێشكەشمكردوە.
وتیشی، داهات هەمووی ناگەڕێتەوە و راستیەكیش هەیە ئەویش ئەوەیە بەناو خەزێنەی حكومەت هەیە، بەڵام لەبنەڕەتدا خەزێنەی حزبە، مانگی رابردوو 360 ملیار دینار داهات هەبووە، ئێستا 160 ملیار دیناری دیارە و 200 ملیارەكەی تری دیارنەماوە.
سەرۆكی فراكسیۆنی كۆمەڵ جەختی لەوەش كردەوە، كوا قسەی وەزیری دارایی و راپۆرتی لەوبارەیەوە و پێویستە رونكردنەوە بدات، ئەم حكومەتە بە حكومەتێكی شكستخواردوو دەزانن و دونیایەك قەیران بوونی هەیە لەم وڵاتەدا، بۆیە داوا دەكەن دەستلەكاربكێشێتەوە خۆ دونیا كاول نابێت، ناتوانن حوكمداریی بكەن با وازی لێبێنن.
