بەڕێوەبەرایەتی نشینگەی پارێزگای سلێمانی رایگەیاند، بەیانی ئەمڕۆ دووشەممە حەوت كەس دەستگیركراون كە هەوڵیانداوە بە ڤیزای شنگنی ساختەوە لە سلێمانییەوە بۆ لوبنان گەشت بكەن و دواتر خۆیان بگەیەننە وڵاتی ئەڵمانیا.
بەڕێوەبەرایەتی نشینگەی پارێزگای سلێمانی لەراگەیەندراوێكدا ئاماژەی بەوەداوە، ئەفسەران و كارمەندانی بنكەی نشینگەی فڕۆكەخانەی سلێمانی كە سەر بە بەڕێوەبەرایەتییانە، بەیانی ئەمڕۆ دووشەممە لە گەشتی “سلێمانی- بەیروت” توانیان حەوت گەشتیار دەستگیر بكەن.
ئەوەش هاتووە، پێنج لەو گەشتیارانە هەڵگری پاسپۆرتی عیراقی بوون و دوانەكەی دیكەشیان هەڵگری رەگەزنامەی ئێرانی بوون، هەستابون بە ساختەكردنی حەوت ڤیزای شنگنی وڵاتی ئەڵمانیا و دەیانویست بەهۆیەوە لە رێگای بەیروتەوە گەشت بۆ ئەو وڵاتە بكەن.
بەپێی راگەیەندراوەكە، دوای ئاشكراكردنی ساختەكەرییەكەیان هەر حەوت گەشتیارەكە رادەستی بنكەی پۆلیسی فڕۆكەخانە كران و پەڕاوی لێكۆڵینەوەیان بۆ كراوەتەوە.
