سرود ئەحمەد بەرپرسی لقی كەركوكی رێكخراوی هیوای عیراقی ئاشكرای كرد، دیاردەی بە شودانی كچانی منداڵ لە شاری كەركوك رووی لە هەڵكشان كردووە و هەندێك لە كچە منداڵە بەشودراوەكان لەكاتی منداڵبووندا گیانیان لەدەستداوە، حاڵەتی بەشودانی كچان لەبری قەرزیش تۆماركراوە.
سرود ئەحمەد بە دەنگی ئەمەریكای راگەیاندووە، بەشودانی كچانی تەمەن 15 تاوەكو 18ساڵ رەزامەندی دادگای دەوێت، بەڵام كچ بەشوو دەدرێت تەمەنی 12 ساڵە ئەمە دژی یاسایە، بەتایبەت بەشێك لەو منداڵانەی بەشوو دەدرێن هێشتا ئاشنا نین بە ماف و ئەركەكانیان.
رونیشیكردووەتەوە، دادگا لەسەر بنەمای راپۆرتی تەندروستی ئەو كچە منداڵانە مارە دەبڕێت و تەندروستیش راپۆرتیان بۆ دەكات لەكاتێكدا قابیلیەتی شووكردنیان نییە، هەفتەیەك لەمەوبەر ژنێكی تەمەن 14 ساڵ لەكاتی منداڵ بووندا گیانی لە دەستداوە، نەك مردن بەڵكو زۆربەی حاڵەتەكانی جیابونەوەش لەنێو ژنانی منداڵدان.
بەرپرسی رێكخراوی هیوای عیراقی ئەوەشی ئاشكرا كردووە، دیاردەی نامۆ و ناشیرین سەریهەڵداوە، هەندێك لەوانەی قەرزارن لەبری قەرز كچەكانیان بەشوو دەدەن، ئەمە دەچێتە چوارچێوەی بازرگانیكردن بە مرۆڤەوە.
