مستەفا كازمی سەرۆكوەزیرانی عیراق رایگەیاند، بڕوای بە بنبەستی سیاسی نییە و هەڵبژاردن بەڕێوەچوو ئێستاش گفتوگۆ هەیە، هیچ بژاردەیەكیشیان لەبەردەم نییە تەنها گفتوگۆ نەبێت.
مستەفا كازمی لە وتارێكدا كە لە نوێژی جەژنی لەدایكبوونی پێغەمبەر عیسا لە كەنیسەی ماریوسف لە بەغدا پێشكەشی كرد وتی، بەداخەوە گوێمان لێ دەبێت كەسانێك دەڵێن ژمارەی كریستیانەكان لە عیراق بەردەوام لە كەمبوندایە، بۆیە دەبێت هانیان بدەین بۆ ئەوەی لە عیراق بمێننەوە و بەشداربن لە بونیادنانی ئەم نیشتمانە.
هێمای بۆ ئەوەش كردووە، بڕوام بە بنبەستی سیاسی نییە و هەڵبژاردن بەڕێوەچوو، ئاستەنگیش هەن كە روبەڕومان دەبنەوە و ئێستاش گفتوگۆ هەیە، بەشێكی وڵاتانیش بۆ ماوەیەكی زۆر دوادەكەون لە پێكهێنانی حكومەت، هیچ بژاردەیەكمان لە پێش نییە گفتوگۆ نەبێت.
سەرۆك وەزیرانی عیراق لە بەشێكی تری قسەكانیدا وتی، پێش چەند هەفتەیەك پۆلێنی عیراق لە بیمەدا دوو پلە بەرزكرایەوە، ئەوە یەكەمجارە لە ساڵی 2003وە ئەوە روودەدات و ئەوەش لە ئەنجامی پەڕەی سپی تایبەت بە چاكسازی ئابووری بوو، كە دەبینین بەرهەمی دەبێت.
