سوپای عیراق و حەشدی شەعبی پرۆسەیەكی ئەمنی هاوبەشیان لە ناوچەكانی نێوان كەركوك و زنجیرە چیاكانی حەمرین بۆ راوەدونانی پاشماوەكانی رێكخراوی داعش دەستپێكرد.
راگەیاندنی حەشدی شەعبی بڵاویكردووەتەوە، بە هەماهەنگی لەگەڵ فەرماندەیی پرۆسەكانی دیالە پلان بۆ ئەنجامدانی هەڵمەتێكی سەربازی دانرا و دوای رەزامەندیدان لەسەری پرۆسەكە لە 5 میحوەرەوە دەستی پێكرد.
رونیشكراوەتەوە، لە پرۆسەكەدا كە چەندین ناوچەی نێوان كەركوك و زنجیرە چیاكانی حەمرین دەگرێتەوە چەندین لیوا و فەوج بەشدارن و لەلایەن فڕۆكە جەنگیەكانی سوپاوە پاڵپشتی ئاسمانی بۆ دابین كراوە.
جەخت لەوەش كراوەتەوە، پرۆسەكە بۆ راوەدونانی پاشماوەكانی رێكخراوی داعش و لەناوبردنی مۆڵگەكانیانە لەو ناوچانە، ئەوەش بە ئامانجی سنوردار كردنی جوڵەی ئەو چەكدارانە كە هێرش دەكەنە سەر هێزە ئەمنیەكان و هاوڵاتیانی مەدەنی.
