گۆران عەوێنە سەرۆكی كۆمەڵەی كرێنشینانی كوردستان ئاشكرای كرد، بە فەرمانی سەرۆكی حكومەت ژمارەیەك یەكەی نیشتەجێبوون لە بەرژەوەندی خەڵكی كەمدەرامەت و كرێنشینان دروست دەكرێن.
گۆران عەوێنە بە ماڵپەڕی فەرمی پارتی راگەیاندووە، هەوڵەكان بۆ چارەسەركردنی كێشەی كرێنشینان بەردەوامن و بڕیارە ئەمساڵ ژمارەیەك شوقە لە سنوری پارێزگای هەولێر بەسەر كرێشنینان و فەرمانبەران دابەش بكرێن، لە زیاتر لە هەزار و 100 شوقە پێكهاتوون و بەشێكیان تەواو بوون و بەشێكی دیكەشیان لە قۆناغی كۆتاییدان.
وتوشیەتی، ئەو شوقانە لەلایەن حكومەتی هەرێمی كوردستانەوە دروست كراون و بەپێی خاڵ و لە رێگەی تیروپشكەوە دابەش دەكرێن، لە سنوری هەر 10 قەزاكەی پارێزگای هەولێر دروست كراون.
سەرۆكی كۆمەڵەی كرێنشینان جەختی لەوەش كردووەتەوە، سەرۆكی حكومەت بڕیاری داوە ژمارەیەك یەكەی نیشتەجێبوون دروست بكرێن بۆ چینی هەژار و كەمدەرامەت، بەبێ پێشەكی و بە نرخێكی هەرزان بە شێوەی قیستی درێژخایەن دابەش بكرێن، ئەمەش هەوڵێكی باشە بۆ چارەسەركردنی كێشەی كرێنشینان و رزگاربوونیان لە كرێچێتی.
