وەزارەتی ناوخۆی عیراق بڵاویكردەوە، تاوانێكی نادیاریان ئاشكرا كردووە كە كەسێك بە پلانگێڕان لەگەڵ دوو كەسی تر هەستاوە بە كوشتنی هاوڕێیەكی، ئەوەش لە پێناو ئەو پارە و ئۆتۆمبێلەی وەك ئەمانەت لەلای دایناوە.
وەزارەتی ناوخۆی عیراق لە بڵاوكراوەیەكدا ئاشكرای كردووە، تاوانێكی كوشتنی نادیار لە بەغدا روویداوە و دوای لێكۆڵینەوە و بەدواداچوون لەلایەن بەڕێوەبەرایەتی بەرەنگاربونەوەی تاوانەوە وردەكاریەكانی ئاشكرا كراوە.
ئەوەش هاتووە، كەسێك هەستاوە بە دانانی پلانی كوشتنی هاوڕێیەكی و بۆ ئەوەش داوای لە برایەكی و ئامۆزایەكی كردووە كە هاوكاری بكەن، ئەوەش لە پێناو ئەو پارە و ئۆتۆمبێلەی تاوانلێكراو لەلای تاوانبار وەك ئەمانەت دایناوە.
بەپێی وردەكاری روداوەكە، ئەو سێ كەسە هەستاون بە كڕینی ماتۆڕسكیلێك و دەمانچەیەك و دوای ئەوەی بردویانەتە نزیك ماڵەكەی خۆی گولـلەیەكیان ناوە بە سەریەوە و هەڵاتوون بۆ شوێنێكی نادیار، بەڵام دوای ئاشكرا كردنی تاوانەكە دەستگیر كراون و بەڵگەی حاشاهەڵنەگریان روبەڕو كراوەتەوە و دانیان ناوە بە تاوانەكەیاندا.
