وەزارەتی تەندروستی هەرێم نرخی پشكنینی كۆرۆنای لە نەخۆشخانە حكومی و ئەهلیەكان كەمكردەوە، لەمەودوا لە نەخۆشخانە حكومیەكان بێبەرامبەر و لە نۆرینگە حكومیەكان 25 هەزار و لە نەخۆشخانە ئەهلییەكان 35 هەزار دینار وەردەگیرێت.
بەپێی نوسراوێكی وەزارەتی تەندروستی كە واژۆی د.سامان بەرزنجی وەزیری تەندروستی لەسەرە، لەمەودوا پشكنینی كۆرۆنا بۆ توشبووان و بەركەوتووان لە نەخۆشخانە و ناوەندە حكومییەكانی كۆرۆنا بە خۆرایی دەبێت.
هەر لە راگەیەندراوەكەشدا هاتووە، هەروەها پشكنینی كۆرۆنا لە نۆرینگەكانی راوێژكاری حكومی دوای دەوام بە 25 هەزار دینار دەبێت، بە هەمان شێوە پشكنینی كۆرۆنا لە فڕۆكەخانە و دەروازەكان بۆ گەشتیاران لە 40 هەزارەوە دەكرێت بە 25 هەزار دینار.
سەبارەت بە تاقیگە و نەخۆشخانە ئەهلیە رێگەپێدراوەكان ئاماژەبەوەكراوە، نرخی پشكنین لەو تاقیگانە لە 50 هەزار دینارەوە بۆ 35 هەزار دینار كەمكراوەتەوە.
