پارێزگاری هەولێر داوا لە حكومەتی عیراق دەكات بە بڕیاری ناردنی 2 ملیار دینارەكەی هاوكاری زیانلێكەوتوانی لافاوەكەی پارێزگاكە بچێتەوە.
لەلێدوانێكی رۆژنامەوانیدا ئومێد خۆشناو پارێزگاری هەولێر رایگەیاند: ئێستا لە كۆتا رۆژەكانی كۆكردنەوەی كەمپینی بەهاناوەچونی زیانلێكەوتواندان و تائێستا بەردەوامە، قەرەبوكردنەوەی زیانلێكەوتوانی لافاوەكەی 30-10ی رابردوو كۆتاییهاتوە ئەوانەی زیانمەندبون هاوكاری كراون، هەروەها لافاوی 17-12 تا ئێستا بەپێی ئەو كەمپینەی كە رایانگەیاندوە نەگەیشتۆتە ئەو ئاستەی هاوكاری ئەو خەڵكە بكەن، لەبەرئەوەی زیانەكان زۆر زۆرن كاتێك حكومەتی عیراق دوو ملیار دیناری تەرخانكرد لە بودجەی بە هاناوەچون و ئێمە رەتمانكردەوە، داواكارین لە حكومەتی عیراقی بەو بڕیارەی خۆیاندا بچنەوە تا بتوانین بەجۆرێكی شایستە هاوكاری خەڵك بكرێت.
لەبارەی ئاڵوگۆڕی ئیداریی لەشاری هەولێر ئومێد خۆشناو وتیشی: بابەتی گۆڕانكاریكردن بابەتێكی ئاسایی و یاساییە لەهەموو كاتێكدا دەكرێت، ئەوەی ئێستاش كە لە سنوری پارێزگای هەولێر دەستیپێكراوە بەشێكیان پەیوەندی بە بۆشایی شوێنەكانەوە هەیە بەشێكیان چەند ساڵێكە لەو پۆستەدان بەشێكی تریان كاری باشتریانكردوەو شوێنی باشترو شایستەتر وەردەگرن، هەندێكیش لە گۆڕانكارییەكان پەیوەندیدار بون بەوەی كەمتەرخەمی هەبوە بەتایبەت لەو شوێنانەی كە لافاو هەبوە، ئەوەیان بەشێكە لەو گۆڕانكاریانەی دەكرێن ئەوەی ئێستاش كراوە تەنها لەئاستی بەڕێوەبەرەكانی شارەوانییەكان كراوە هەموی پەیوەندیدار نییە بە بابەتی لافاوەوە.
