عومەر گوڵپی ئەندامی پەرلەمانی كوردستان رایگەیاند، لەسەر كەمبونەوەی كاتژمێرەكانی كرەبا و گرانبوونی سوتەمەنی داوایان كردووە وەزیرانی كارەبا و سامانە سروشتیەكان بانگهێشتی پەرلەمان بكرێن.
گومەر گوڵپی لە تۆڕی كۆمەڵایەتی فەیسبووك بڵاویكردووەتەوە، ئەو كارەبایەی ئەم كابینەیە دەڵێت زیادیان كردووە، لە شەو و رۆژێكدا بۆ نزیكەی تەنها 5 كاتژمێر كەمبووەتەوە، ئەمەش جگە لە لەدەستدانی سەرچاوەی گەرمكردنەوەلای خەڵك، هەروەها نرخی كارەبای موەلیدە گران بووە و نرخی بەرمیلێك نەوتیش لە هەندێك شار گەیشتووەتە 185 هەزار دینار، هەروەها نرخی بتڵێك غاز 11 تاوەكو 20 هەزار دینارە.
پێشی وایە، حكومەت و دەسەڵات لەم دۆخە سەختە پشتیان لە هاوڵاتیان كردووە، بیریان لای هەژارێك نیە كە كاتێك كارەبای لەسەر دەكوژێننەوە چۆن منداڵەكانی لەم سەرما سەختەی زستان بپارێزێت.
ئەو پەرلەمانتارە ئاماژەی بەوەشداوە، هەردوو وەزارەتی سامانە سروشتیەكان و كارەبا ئەبێت وەڵامی پرسیار و داوای خەڵك بدەنەوە، بۆ وەڵامدانەوەی ئەو پرسیارانە داوایان لە دەستەی سەرۆكایەتی پەرلەمان كردووە لیژنەی وزەو سامانە سروشتیەكان راسپێرن بە بانگهێشتی هەردوو وەزیر بۆ كۆبوونەوەی لیژنەكەیان بۆ ئەوەی پرسیار و داوا و كێشەی خەڵكیان رووبەڕوو بكەنەوە.
