شێركۆ میروەیس ئەندامی سەركردایەتی یەكێتی پێی وایە، هێزە سیاسیەكان باوەڕیان بە دەستاودەستكردنی دەسەڵات و بوون بە ئۆپۆزسیۆن نییە و رەنگە حكومەتی زۆرینە دۆخەكە بە ئاقاری خراپدا ببات.
شێركۆ میروەیس بە دەنگی ئەمەریكای وتووە، دۆخی سیاسی عیراق تەواو نالەبارە و خەڵك توشی دڵەڕاوكێ بووە، هێزە سیاسییەكان باوەڕیان بە دەستاودەستكردنی دەسەڵات و بوون بە ئۆپۆزسیۆن نییە.
رونیشیكردووەتەوە، هێزەكان هێندەی پلانی تەسفیەكردنی یەكیان هەیە هێندە پلانی ئاوەدانكردنەوە و بوژاندنەوەیان نیە، هێندە دەستوەردانی وڵاتان لەكاروباری عیراق زۆرە هەندێكجار هەست دەكرێت عیراق خۆی ئامادە نییە، ئەگەر خاوەن خەبات و ژیرەكان نەیەنە سەر هێڵ، عیراق لەبەردەم قەیرانی گەورەدایە.
ئەو پەرلەمانتارەی پێشووی عیراق رونیشیكردووەتەوە، لەحاڵەتی خراپی دۆخی عیراقدا، دەبوو كورد و هێزە سیاسیەكان پلان و ستراتیژی هاوبەشیان هەبووایە، بەتایبەت ئەگەر كورد لە كەركوك یەك لیست بوایە، لەبری 6 كورسی 8 كورسی دەهێنا، لە خانەقین لەبری كورسییەك دوو كورسی دەبرد، هەروەها لە موسڵیش.
