وەزارەتی نەوتی عیراق ئاشكرای كرد، مانگی رابردوو نزیكەی 100 ملیۆن بەرمیل نەوتی فرۆشتوەو داهاتەكەی زیاتر لە 8 ملیار دۆلار بووە، هەر بەرمیلێكیش 83 دۆلار و 24 سەنت فرۆشراوە.
وەزارەتی نەوتی عیراق لە راگەیەندراوێكدا بڵاویكردوەتەوە، بەگوێرەی ئامارەكان كە لەلایەن كۆمپانیای بەبازاڕكردنی نەوتی عیراقییەوە “سۆمۆ”وە بڵاوكراوەتەوە، مانگی یەكی ئەمساڵ رێژەی نەوتی خاوی هەناردەكراو 99 ملیۆن و 286 هەزار و 78 بەرمیل نەوت بووە و داهاتەكەشی هەشت ملیار و 27 ملیۆن دۆلار بووە.
هێمای بۆ ئەوەشكردوە، كۆی گشتی نەوتی خاوی هەناردەكراو بۆ مانگی كانونی دووەمی 2022 لە كێڵگە نەوتییەكانی ناوەڕاست و باشووری عیراق 96 ملیۆن و 430 هەزار و 596 بەرمیل بووە، لە كێڵگەكانی كەركوك كە لەرێگەی بەندەری جەیهانەوە هەناردەكراوە 2 ملیۆن و 545 هەزار و 656 بەرمیل بووە.
وەزارەتی نەوتی عیراق ئاشكراشی كردووە، رۆژانە زیاتر لە 3 ملیۆن و 203 هەزار بەرمیل نەوتی خاو هەناردەكراوە و نرخی هەر بەرمیلێكیش بە 83 دۆلار و 24 سەنت فرۆشراوە.
