قوباد تاڵەبانی جێگری سەرۆكی حكومەتی هەرێمی كوردستان رایگەیاند: لەپێناو پاراستنی هەرێم و كوردستان پێویستە ناوبەناو یەكبگرینەوە.
قوباد تاڵەبانی لە میانی دانانی تاجەگوڵینە لەسەر مۆنۆمێنتی شەهیدانی 1ی شوبات لەشاری هەولێر لە لێدوانێكدا بۆ كەناڵەكانی راگەیاندن وتی:
كوردستان مێژوەكەی پڕە لەیادی تاڵ و دڵتەزێن 1ی شوباتیش یەكێكی ترە لەو یادانەی كە ساڵانە دەیكەینەوە، كۆمەڵێك خەڵكی بێتاوان كوژران لەپێناوی نەتەوەو بیروباوەڕەكەیان، پەیامم بۆ میللـەتەكەی خۆمان و خۆشمان ئەوەیە كە ئێمە لەناوچەیەكدا دەژین كە خەڵك رقی لێماندەبێت بەهەر هۆكارێك بێت، بۆیە كە دەزانین ئەوەندە كەس رقی لە ئێمەیە حەق نییە خۆمان ئەوەندە رقمان لە خۆمان بێت و حەقیشە ناوبەناو یەكبگرینەوە لەپێناوی پاراستنی هەرێمەكەمان و كوردستانەكەمان و ئەو بیروباوەڕانەی كە رۆژانە لەپێناویان خەبات دەكەین.
وتیشی: دووبارە سەرەخۆشی دەگەیەنم بە كەسوكاری شەهیدانی یەكی شوبات و شەهیدانی رێگەی رزگاریخوازی گەلەكەمان و شەڕەكانی تیرۆرو ئەوانەی لەپێناوی خاك و نیشتماندا گیانیان بەخت كرد.