رۆژنامەی ئەلعەربی چاپی لەندەنی بڵاویكردووەتەوە، پێداگری مەسعود بارزانی لەسەر پاڵاوتنی هۆشیار زێباری بۆ پۆستی سەرۆك كۆمار و كردنەوەی كەناڵی پەیوەندی لەگەڵ چوارچێوەی هەماهەنگی بە چاودێری ئێران، هۆكاری ساردبونەوەی سەدر بوو لە پارتی.
رۆژنامەی ئەلعەرب لە راپۆرتێكدا ئاماژەی بەوەداوە، ساردبوونەوەی موقتەدا سەدر رێبەری رەوتی سەدر لە مەسعود بارزانی سەرۆكی پارتی دیموكراتی كوردستان و پەنابردن بۆ بایكۆت كردنی دانیشتنی پەرلەمان بۆ هەڵبژاردنی سەرۆك كۆمار دوو هۆكاری هەیە.
سەبارەت بە هۆكارەكان هاتووە، هۆكاری یەكەم ناڕەزایەتییە لە گفتوگۆكانی دیاریكردنی سەرۆككۆمارێكی تەوافوقی و پێداگری بارزانییە لەسەركاندیدكردنی هۆشیار زێباری، هۆكاری دووەمیش كردنەوەی كەناڵی پەیوەندییە لەگەڵ چوارچێوەی هاوئاهەنگی شیعەكان لە لایەن پارتییەوە بە چاودێری ئێران.
راپۆرتەكە باسی لەوەش كردووە، بۆیە سەدر لە تویتێكدا رایگەیاند، ئەگەر كاندیدی پارتی بۆ پۆستی سەرۆك كۆمار مەرجەكانی تێدانییە، ئەوە پەرلەمانتارانی چاكسازیخواز دەنگی پێنەدەن، چونكە لە خەمی چاكسازیداین نەك خوازیاری دەسەڵات.
