قاسم ئەعرەجی راوێژكاری ئاسایشی نیشتمانی عیراق دەڵێت، گروپی چەكدارییان ناوێت عیراق بكاتە ناوچەیەك بۆ دروست كردنی هەڕەشە لەسەر وڵاتان، هەر بیانییەك رێز لە سەروەری عیراق و یاساكان دەگرێت پێشوازی لێدەكەن.
قاسم ئەعرەجی لە تویتێكدا بڵاویكردووەتەوە، پەیوەندییەكانیان لەگەڵ ئەمریكا و هاوپەیمانی نێودەوڵەتی دژی ئێران نییە، هەروەها پەیوەندییەكانیان لەگەڵ ئێران دژی ئەوان نییە، هەروەك پەیوەندی عیراق بە سعودیەوە دژی تاران نییە و بە پێچەوانەشەوە، ئامانجی عیراق بەرژەوەندی نیشتمانییەتی.
جەختی لەوەش كردووەتەوە، گروپی چەكدارییان ناوێت خاكی عیراق بكاتە ناوچەیەك بۆ دروست كردنی هەڕەشە لەسەر ئێران یاخود هەر دەوڵەتێكی تر، هەر بیانییەك رێزی سەروەری عیراق و یاساكانی دەگرێت پێشوازی لێدەكەن.
راوێژكاری ئاسایشی نیشتمانی عیراق ئاماژەی بەوەشداوە، عیراق نییەتەكانی راستەقینەیە و پێی وایە سەقامگیری بە كۆتایی هاتنی ناكۆكیەكانی نێوان دەوڵەتانی دراوسێ دەست پێدەكات و هەوڵی نزیككردنەوەی بیروبۆچونەكان دەدات لەنێوان سعودیە و ئێران.
