بەڕێوەبەرایەتی گشتی هاتوچۆی عیراق جەخت لەوە دەكاتەوە، هەر كەسێك لەكاتی شۆفێریدا مۆبایل بەكاربهێنێت بە 100 هەزار دینار سزا دەدرێت.
یاس خزر موتڵەگ بەڕێوەبەری بەشی پەیوەندی و راگەیاندنی هاتوچۆی عیراق رایگەیاندووە، یاسای هاتوچۆی ژمارەی 8ی ساڵی 2019 سزای سەرپێچی بەكارهێنانی مۆبایلی لەكاتی شۆفێریدا بە 100 هەزار دینار دیاری كردووە، ئەوەش سزایەكی یاسایی فەرمییە و لە هاوڵاتیان وەردەگیرێت.
باسی لەوەش كردووە، رێنمایی هەیە لە یاساكەدا كە پۆلیسی هاتوچۆ دەتوانێت هەندێكجار سزاكە بكاتە 200 هەزار دینار ئەگەر سەرپێچییەكە واتە بەكارهێنانی مۆبایل بوو بە مەترسییەك لەناو كۆمەڵگەدا.
بەڕێوەبەری بەشی پەیوەندی و راگەیاندنی هاتوچۆی عیراق لە بەشێكی تری قسەكانیدا جەختی لەوە كردووەتەوە، مەفرەزەكان لە هەموو پارێزگاكان دەستبەكارن بۆ سزادانی سەرپێچیكەران.
