عەلی حەمە ساڵح ئەندامی پەرلەمانی كوردستان ئاشكرای كرد، هەموو مانگێك 350 ملیۆن دۆلار پارەی نەوت دێت بۆ موچەی فەرمانبەران، بەڵام ئەگەر عیراق نەوتی هەرێم وەربگرێت دەبێت نزیكەی 700 ملیۆن دۆلار بدات بە هەرێم.
عەلی حەمەساڵح لە پەیامێكی ڤیدیۆییدا بڵاویكردووەتەوە، ئەگەر بڕیارەكەی دادگای فیدراڵی عیراق بچێتە بواری جێبەجێكردنەوە چەند لایەنێكی دەبێت و دۆسیەی كێڵگە نەوتییەكان و گرێبەستەكانی نەوت پێداچونەوەی بۆ دەكرێت و ئەوەش هیچ زەرەرێكی هەرێمی تێدا نییە.
رونیشیكردووەتەوە، هەروەها بابەتێكی تر كرێی بۆری نەوتە، ئەو بەشە بۆریەی لەناو خاكی توركیادایە دوو هێندەی ئەو بەشەیە لە ناو خاكی هەرێمە، بەڵام ئەوەی جێی سەرنجە كرێی بەشەكەی ناو هەرێم دوو هێندەی كرێی ئەوەی توركیایە، لە ماوەی 18 مانگدا تەنها كۆمپانیای كار و روزنەفت یەك ملیار و 108 ملیۆن دۆلاریان وەرگرتوە و كۆمپانیای وزەی توركیاش 476 ملیۆن دۆلاری وەرگرتوە، عیراق ئەمەی قبوڵ نیە.
ئەو پەرلەمانتارە لە بەشێكی تری قسەكانیدا وتویەتی، هەموو مانگێك 350 ملیۆن دۆلار پارەی نەوت دێت بۆ موچەی فەرمانبەرانی هەرێم، ئەگەر عیراق ئەم نەوتە وەربگرێت ئەوكات دەبێت نزیكەی 700 ملیۆن دۆلار بدات، واتا 350 ملیۆن دۆلار قازانج دەكەین، هەرێم دەبەسترێتەوە بە شەبەكەی سوتەمەنی عیراقییەوە، واتا بەنزینی 450 دیناری و نەوت و غاز و ئەو پڕۆسەیە دەیگرێتەوە و لەوەشدا خەڵكی كوردستان قازانج دەكات.
