عەباس ئەكرەم وتەبێژی وەزارەتی خوێندنی باڵا و توێژینەوەی زانستی رایگەیاند، رێكارەكانی دابەشكردنی پاڵپشتی دارایی خوێندكاران تەواو كراون، سەرچاوەیەكیش دەڵێت، لەئەمڕۆ یەكشەممەوە دەست بەدابەشكردنی دەكرێت.
عەباس ئەكرەم لە لێدوانێكی رۆژنامەوانیدا وتویەتی، لە وەزارەتی خوێندنی باڵا سەرجەم رێكارە كارگێڕی و یاساییەكانی دابەشكردنی پاڵپشتی دارایی خوێندكارانی زانكۆ تەواو كراون، لیستی ناوی خوێندكارانیش ئاڕاستەی بانكەكان كراوە بۆئەوەی دەست بەدابەشكردنی بكرێت.
باسی لەوەش كردووە، لەم چەند رۆژەدا دەست بەدابەشكردنی دەكرێت و هیوادارن لە بانكەكان كێشەیان بۆ دروست نەكرێت و بەزویی پاڵپشتیەكە بگەیەندرێتە دەستی خوێندكاران.
سەرچاوەیەكیش لە زانكۆی سلێمانییەوە ئاشكرای كردووە، لەئەمڕۆ یەكشەممە دەست بەدابەشكردنی پاڵپشتی خوێندكاران دەكرێت و خوێندكاران لە رێگەی بەشەكانی خۆیانەوە دەتوانن پاڵپشتیەكەیان وەربگرن.
