حاكم رزگار محەمەد ئەمین كاندیدی پۆستی سەرۆك كۆماری عیراق دەڵێت، كێشەی نییە یەكێتی و پارتی رێكبكەون و بیكەن بە پاڵێورای هاوبەشی خۆیان بۆ پۆستی سەرۆك كۆمار.
حاكم رزگار لە گفتوگۆیەكی تەلەفزیۆنیدا وتویەتی، چاوچنۆكی ئیستغلال كردنی پۆست و دەستكەوتی ماددی نییە، بەبێ پشتگیری حزب و بە شێوەیەكی سەربەخۆ خۆی بۆ پۆستی سەرۆك كۆمار پاڵاوتووە.
رونیشیكردووەتەوە، كێشەی نییە ئەگەر كاندیدی هاوبەشی نێوان یەكێتی و پارتی بێت و هیواخوازە ببێتە هۆكارێكی خێر لە ناكۆكیەكانی نێوان ئەو دوو حزبە.
ئەو كاندیدەی پۆستی سەرۆك كۆمار لە بەشێكی تری قسەكانیدا جەختی لەوە كردووەتەوە، گەشەسەندنی ناكۆكیەكانی نێوان لایەنە كوردیەكان لەوانەیە بگاتە ئاستێك كە كەس پێی خۆش نەبێت و ئەو هەوڵە زۆرەی بۆ یەكخستنی ماڵی كوردی دەدرێت بە هەدەر بڕوات.
