سەرۆكی تیمی پارێزەرانی خۆبەخشی حوكمدراوانی بادینان رایگەیاند، بە مەرسومی نێچیرڤان بارزانی سەرۆكی هەرێمی كوردستان 60%ـی سزای حوكمدراوانی بادینان كەمكراوەتەوەو شەش مانگی دیكە ئازاد دەكرێن.
بەشدار حەسەن سەرۆكی تیمی پارێزەرانی خۆبەخشی حوكمدراوانی بادینان بە كەناڵی روداوی راگەیاندوە، مەرسومەكەی سەرۆكی هەرێمی كوردستان بڕیاری لێخۆشبون نییە، بەڵام بڕیاری سوككردنی سزاكەیە بە رێژەی 60%.
دادگای تاوانی هەولێر رۆژی 16-2-2021 بەتۆمەتی “تێكدانی ئاسایشی نیشتمانی” هەریەكە لە شێروان شێروانی، ئەیاز كەرەم، گوهدار حەمەدەمین، هاریوان عیساو شڤان سەعیدی” هەر یەكەیان بە شەش ساڵ زیندانیكردن سزادا.
پێشتریش ئومێد بەرۆشكی كە حوكمدراوێكی بادینان بوو دوای مانەوەی ساڵێك و حەوت مانگ لە زیندان ئازادكرا.
