نێچیرڤان بارزانی سەرۆكی هەرێمی كوردستان لە پەیامێكدا لەبارەی سوتاندنی شنیار ئەنوەر لەلایەن هاوسەرەكەیەوە لە سلێمانی دەڵێت، هەموو لایەك دڵنیا دەكەنەوە كە تاوانباران رووبەڕووی یاسا دەكرێنەوە.
نێچیرڤان بارزانی لە پەیامەكەیدا ئاماژەی بەوەداوە، دووپاتی دەكاتەوە كە وەك هەمیشە و تاوەكو كۆتایی بەرەنگاری دیاردەی قێزەوەنی توندوتیژی خێزانی دەبنەوە و بە هەموو شێوەیەك سەركۆنەی ژنكوژی و سەركوتكردن و ئازاردانی ئافرەتان دەكەن بە هەر بەهانەیەك بێت.
وتوشیەتی، هەموو لایەك دڵنیا دەكەنەوە كە تاوانباران رووبەڕووی یاسا دەبنەوە و هەموو دامودەزگا پەیوەندارەكانی هەرێمی كوردستان بە گوڕتر رووبەڕووی ئەو كولتوورە دواكەوتووە دەبنەوە، بەداخەوە ئامارەكانی ژنكوژی و توندوتیژی بەرامبەر ئافرەتان بە هەموو جۆرەكانییەوە، هێشتا مایەی نیگەرانییەكی گەورەن و ناو و ناوبانگی هەرێمی كوردستان و كۆمەڵگە لەكەدار دەكەن، بۆیە بەرپرساریەتی دەخەنە ئەستۆی هەموومان.
سەرۆكی هەرێم لە بەشێكی تری پەیامەكەیدا باسی لەوە كردووە، هەموو دامەزراوە و دەزگا فەرمییەكان و كۆمەڵگە و مامۆستایانی ئاینی و رێكخراوە مەدەنییەكان و میدیا، بەرپرسیاریەتی هاوبەشمان هەیە كە بەردەوام بین و پێكەوە كار بكەین بۆ بنەبڕكردن و نەهێشتنی ئەو كولتوورە دواكەوتووە و برەودان بە هۆشیاری و گیانی لێبوردەیی و ناتوندوتیژی.
