پەرلەمانی عیراق بە ئامادەبوونی عەلی عەلاوی وەزیری دارایی، گفتوگۆ كردنی لەسەر نرخی دۆلار بەرامبەر دینار و كاریگەرییەكانی دەست پێ كرد.
بازنەی راگەیاندنی پەرلەمانی عیراق بڵاویكردووەتەوە، پەرلەمان دەستی كردووە بە گفتوگۆ كردن لەسەر نرخی دراو و كاریگەرییەكانی لەسەر بازاڕ و بەرزبونەوەی نرخ و زەرەرمەند بوونی چینی هەژاران.
ئەوەش هاتووە، گفتوگۆكە بە ئامادەبوونی عەلی عەلاوی وەزیری دارایی دەستی پێ كردووە، هەروەها گفتوگۆ لەسەر قەرزی گشتی و سیاسەتی دارایی وەزارەتەكە و چارەسەرەكان دەكرێت.
لەماوەی رابردودا و دوای دابەزینی بەرچاوی نرخی نەوت بەهۆی پەتای كۆرۆناوە وەزارەتی دارایی نرخی 100 دۆلاری لە 118 هەزارەوە گەیاندە 146 هەزار، بەڵام لە ئێستادا كە نرخی نەوت بەرزبوونەوەی بەرچاوی بەخۆیوە بینیوە داوا دەكرێت نرخی دۆلار كەمبكرێتەوە، وەزارەتی داراییش ئەوە رەتدەكاتەوە.
