نرخی نەوتی خاو بەرزبوونەوەی بەخۆیەوە بینی و یەك بەرمیل خاوی برێنت بە نزیكەی 103 دۆلار مامەڵەی پێوە دەكرێت.
بەپێی راپۆرتەكان لە بازاڕەكانی مامەڵە كردن بە نەوتی خاوەوە، سەرلەبەیانی ئەمڕۆ دووشەممە نرخی یەك بەرمیل خاوی برێنت گەیشتە 103 دۆلار و 15 سەنت بەڵام دواتر كەمێك هاتە خوارەوە و لە ئێستادا بە 102 دۆلار و 62 سەنت مامەڵەی پێوە دەكرێت.
بەپێی هەمان ئەو راپۆرتانە، هەروەها یەك بەرمیل خاوی خۆرئاوای تەكساسی ئەمریكی بەرامبەر 96 دۆلار و 71 سەنتە، بەرمیلێك خاوی رێكخراوی ئۆپێكیش بە 101 دۆلار و 22 سەنتەوە مامەڵەی پێوە دەكرێت.
هۆكاری بەرزبوونەوەی نرخی نەوت لەماوەی چەند رۆژی رابردوودا بەشێوەیەكی بەرچاو، بۆ شەڕی روسیا و ئۆكرانیا دەگەڕێتەوە و پێشبینی دەكرێت لەوەش زیاتر بەرز ببێتەوە، هەروەها لە چەند رۆژی رابردودا 105 دۆلاری تێپەڕاند.
