لە یادی راپەڕیندا فراكسیۆنەكانی یەكێتی و پارتی لە پەرلەمانی عیراق لە كۆنگرەیەكی رۆژنامەوانی هاوبەشدا جەختیان كردەوە، دیسان پێویستمان بە یەكڕیزی و یەك دەنگی و یەكگرتوییە بۆ پاراست و بەرگریكردن لە مافە دەستورییەكانمان و بەدیهێنانی ئامانج و مافەكانمان.
هەردوو فراكسیۆنی یەكێتی و پارتی لە یادی راپەڕیندا لە كۆنفرانسێكی رۆژنامەوانی هاوبەشدا لە پەرلەمانی عیراق جەختیان لەوە كردەوە، لە یادی 31 ساڵەی راپەڕینی شكۆداری گەلی كوردستاندا یادەكە بەرز رادەگرن، كە لە شاری رانیە هاوكات لەگەڵ راپەرینی عیراقیەكان لە بەسڕە و چەند شارێكی تر دەستیپێكرد.
رونیشیان كردەوە، ئێمە رۆڵی شەهیدانی راپەڕینمان بیر ناچێت و بەڵێن دەدەین بەرگری لە مافە دەستوریەكانی گەلی كورد و عیراق بكەین و سەربەرزی بۆ شەهیدانی راپەڕین و ئازادی لە كوردستان و عیراق.
هەردوو فراكسیۆن باسیان لەوەشكرد، وەك لای هەموان ئاشكرایە سەركەوتنی راپەڕین بەهۆی یەكڕیزی گەلی كوردستان و لایەنە سیاسییەكان بوو، بۆیە لەم رۆژەدا جەخت لەوە دەكەینەوە كە دیسان پێویستمان بە یەكڕیزی و یەك دەنگی و یەكگرتوییە بۆ پاراست و بەرگریكردن لە مافە دەستورییەكانمان و بەدیهێنانی ئامانج و مافەكانمان.
