بەهۆی كوژانەوەی مۆلیدەكانیان و بڕینی كارەبا لە هاوڵاتیان، بڕیاری دەستگیر كردن بۆ خاوەن مۆلیدەكانی قەزای كۆیە دەركرا و تاوەكو ئێستا 28یان دەستگیر كراون.
لەو بارەیەوە تاریق حەیدەری قائیمقامی قەزای كۆیە بە میدیاكانی وتووە، خاوەنی مۆلیدەكان داوایانكرد نرخی ئەمپێری كارەبا بەرزبكەنەوە و ئەوانیش وتوویانە، كە نابێت بەدەربێت لە رێنماییەكان و جیاوازبێت لە شارەكانی دیكە و بەتەنیا لە كۆیە نرخ بەرزبكرێتەوە.
رونیشیكردووەتەوە، دوو رۆژ گفتوگۆیان لەگەڵیان كرد كە كارەبا نەكوژێننەوە و داوامان كرد خەڵك نەكەنە قوربانیی چاوچنۆكی و بەرژەوەندی خۆیان، بەڵام دواجار بە كۆی گشتی بڕیاریاندا و مۆلیدەكانیان كوژراندەوە، ئەوانیش وەك قائیمقامییەت و لیژنەی مۆلیدە سكاڵایان لەسەریان تۆمار كرد.
تاریق حەیدەری لە بەشێكی تری قسەكانیدا وتویەتی، 55 مۆلیدە لە كۆیە هەیە كە 31 كەس خاوەنیانە و هەیانە زیاد لە مۆلیدەیەكی هەیە، تاوەكو ئێستا 28یان دەستگیر كراون و سێیان ماون دەستگیر بكرێن، دەرگاش دەكەنەوە بەڕووی هەركەسێكدا بیەوێت مۆلیدە دابنێت و بچێتە شوێنی ئەو كەسانە.
