د. بێوار خنسی راوێژكاری سەرۆكی حكومەتی هەرێم رایگەیاند، ئەو شاندەی نێردرا بۆ بەغدا هیچ رێككەوتنێكیان نەكردوە و تەنها بۆچوون ئاڵوگۆڕ كراوە و هەرێم بۆچوونی وایە بەپێی دەستوور كێشەكان چارەسەر بكرێن.
بێوار خنسی بەماڵپەری فەرمی پارتی وتووە، حكومەتی هەرێم لە رێگەی ئەو شاندەی سەردانی بەغدای كردبوو بۆچوونی خۆی لە بارەی نەوت و غاز و چارەسەركردنی كێشەكان بەشێوەی بنەڕەتی گەیاندە حكومەتی عیراق، كە پێویستە بەپێی دەستوور كێشەكان چارەسەر بكرێن، بۆ ئەو مەبەستەش یاسای نەوت و غاز بە هاوبەشی ئامادەبكرێت و پەسەند بكرێت لە پەرلەمان.
ئاشكراشیكردووە، شاندی حكومەتی هەرێم بۆ راوێژ رۆیشتبوون نەك بۆ رێككەوتن هیچ رێككەوتنێك نەكراوە و تەنها بۆچوون ئاڵوگۆڕ كراوە و لە گفتوگۆش بەردەوام دەبن، گفتوگۆكانیش نەك تەنها لەسەر نەوتە، بەڵكو لەسەر پێشمەرگە و بودجە و گومرگیشە.
وتوشیەتی، شاندی حكومەتی هەرێم ئامادەیی خۆی نیشانداوە بۆ چارەسەركردنی كێشە و گرفتەكان بەپێی ئەو ماددە دەستوریانەی باسی نەوت و غاز دەكەن، بە جۆرێك چارەسەرێك بدۆزنەوە لەگەڵ سیستەمی فیدراڵی عیراق بگونجێت، وەزارەتی نەوتی عیراقیش ئامادەیی دەربڕیوە و هاوكار دەبن.
