كارمەندانی خۆبەخشی تەندروستی لە سلێمانی گردبوونەوەیەكیان ئەنجامدا و بایكۆتی دەوامیان راگەیاند و داوای دامەزراندن دەكەن، پێشیان وایە لە دامەزراندن جیاوازی لەنێوان شارەكان دەكرێت.
بەپێی زانیاریەكان، ئەو كارمەندانە لەبەردەم كلینیكی راوێژكاری هەناوی فێركاری “شەهید دكتۆر هێمن”ی تایبەت بە كۆرۆنا گردبوونەوە و بایكۆتی دەوامیان راگەیاند.
ئەو كارمەندانە باس لەوە دەكەن، هۆكاری راگەیاندنی بایكۆت ئەوەیە كە مافی خۆیان پێنادرێت و دانامەزرێنرێن و تەنها موچەیەكی كەمیان پێدەدرێت، حكومەت كارێك دەكات كە هەست بەوە بكەن كاری خۆبەخشی هەڵەیە.
بەشێكی تر لەو كارمەندانە جەخت لەوە دەكەنەوە، تەنانەت لەنێوان شارەكاندا جیاوازی هەیە و دامەزراندن ناوچەگەری تێكەوتووە و هۆكاری سەرەكی خۆپیشاندانەكەیان ئەو جیاوازییەیە و تاوەكو دامەزراندن یاخود گرێبەستیان بۆ نەكرێتەوە نیازیان نییە بایكۆت بشكێنن و بەهۆی ئەوەشەوە نەخۆش زیاد دەكات.