پلەكانی گەرما لە پارێزگای ماهاراشترای هیندستان بۆ بەرزترین پلە لە ماوەی 6 ساڵی رابردوو بەرزبوونەوە و بەهۆیەوە تاوەكو ئێستا 25 كەس گیانیان لەدەستداوە.
وەزارەتی تەندروستی هیندستان بڵاوی كردەوە، پلەكانی گرەما لە پارێزگای ماهاراشترای بەشێوەیەكی بەرچاو بەرزبوونەوەی بەخۆیەوە بینیوە و بەرزترین پلە لەماوەی 6 ساڵی رابردودا تۆمار كراوە، بەهۆی ئەوەشەوە تاوەكو ئێستا 25 كەس گیانیان لەدەستداوە.
رونیشكراوەتەوە، لە ساڵی 2022دا تاوەكو سەرەتای مانگی ئایار 381 كەس بەهۆی بەرزبوونەوەی پلەكانی گەرماوە تەندروستییان تێكچووە، لە ماوەی چەند هەفتەی رابردووشدا لە زۆر ناوچەی وڵاتانی هیندستان و پاكستان، پلەكانی گەرما بەشێوەیەكی مەترسیدار بەرزبوونەتەوە.
وەزارەتی تەندروستی هیندستان ئاماژەی بەوەشداوە، رۆژی 28ی نیسان پلەی گەرما لە نیودەلهی پایتەخی هیندستان بۆ سەروو 40 پلە بەرزببوویەوە، لە پارێزگای ئۆدیشا لە خۆرهەڵاتی وڵاتەكە خوێندنگەكان بۆ ماوەی هەفتەیەك داخرابوون و لە زۆر ناوچە پلەكانی گەرما بۆ سەروو 45 پلە بەرزببوونەوە.
