لە قەزای شەقڵاوە هێزێكی ئەمریكی گولـلە بە چەند ماڵێكەوە دەنێن و بەرپرسێكی ناوچەكەش دەڵێت، تەقەكردنەكە لە كاتی مەشق و راهێناندا بووە بە هەڵە كراوە و هیچ زیانێكی گیانی نەبووە.
لەو بارەیەوە جەنگاوەر ئاژگەیی بەڕێوەبەری ناحیەی باسرمەی سەربە قەزای شەقڵاوە بە میدیاكانی وتووە، ئەو هێزە ئەمریكییە لە فڕۆكەخانەی هەریر جێگیر كراون و لەكاتی رووداوەكەدا كە كاتژمێر 10ی شەوی رابردوو بووە لە مەشق و راهێناندا بوون و راهێنانیان لەسەر خستنەخوارەوەی درۆن كردووە.
ئەوەشی ئاشكرا كردووە، بە هەڵە تەقەیان كردووە و گولـلەكان لە ناوەڕاستی ناحیەكەدا كەوتوونەتە خوارەوە و بەر 11 خانو و ئۆتۆمبێلێك كەوتوون، بەڵام رووداوەكە هیچ زیانێكی گیانی لێنەكەوتووەتەوە.
بەپێی وتەكانی بەڕێوەبەری ناحیەی باسرمە، دوای رووداوەكە هێزە ئەمنییەكان گەیشتوونەتە شوێنەكە و ئەمریكییەكان بە فەرمی ئاگادار كراونەتەوە لەوەی ، چیتر نابێت ببنە مەترسی لەسەر هاوڵاتیان.
