عومەر گوڵپی ئەندامی لیژنەی دارایی پەرلەمانی عیراق دەڵێت، پرسیاری دواكەوتن و خاو دابەشكردنی موچەیان لە وەزیری دارایی كردووە و وەڵامەكەی نەناردنی 200 ملیارەكەی بەغدایە، بەڵام ئەم وەڵامە خۆلادانە لە وەڵام.
عومەر گوڵپی لە تۆڕی كۆمەڵایەتی فەیسبووك نوسیویەتی، داوای رونكردنەوە و زانیارییان لە هۆكاری دواكەوتنی موچە و خاو دابەشكردنی كردووە، وەزیری دارایی وەڵامی داونەتەوە و هۆكارەكەی بۆ نەناردنی 200 ملیارەی بەغدا گەڕاندووەتەوە.
هێمای بۆ ئەوەش كردووە، ئەم وەڵامە بڕواپێهێنەر نییە و خۆلادانە لە وەڵامی راستەقینە و دەستخستنە سەر برینەكان، بەتایبەت لەلایەن وەزارەتی داراییەوە كە پێویستە ئاگاداری هەموو شتێك بێت و بە روونی كێشە داراییەكان بۆ ئێمە و خەڵكی رونبكاتەوە، هەروەها بە هاوڵاتیانی سنوری پارێزگای سلێمانی و هەڵەبجە و گەرمیان و راپەڕین بڵێت، هۆكار چییە كە ئەو گرفتەی لەو شارانە هەیە لە هەولێرو دهۆك نییە.
ئەو پەرلەمانتارە راشیگەیاندووە، بەرپرسیارێتی وەزیری داراییە زانیاری و راستییەكان وەك خۆی بۆ هاوڵاتیان رونبكاتەوە و بەپێی یاسا وردەكاری داهات و خەرجی حكومەت بۆ ئێمە و خەڵك ئاشكرا بكات، چونكە پارەو داهات موڵكی خەڵكی كوردستانە نەوەك حزبەكانی دەسەڵات.
