ئەمینداری گشتی یەكگرتوی ئیسلامی كوردستان لهگهڵ سەرۆکی فراکسیۆنی تورکمانی له پهرلهمانی عێراق كۆبوهوه و رایگهیاند، کورد و تورکمان دو نەتەوەی خاوەن مێژوی هاوبەشن، پێکەوە قۆناغە سەختەکانی ستەمی سیاسی و کۆمەڵایەتیان بڕیوە.
بهپێی راگهیهندراوێكی نوسینگهی ئەمینداری گشتی یەكگرتوی ئیسلامی كوردستان، لە درێژەی دیدارەکانی لە ئەنجومەنی نوێنەران، سەلاحەدین بەهائەدین لهگهڵ ئەرشەد ساڵحی، سەرۆکی فراکسیۆنی تورکمانی کۆبوەوه و رایگهیاند، “کورد و تورکمان دو نەتەوەی خاوەن مێژوی هاوبەشن، پێکەوە قۆناغە سەختەکانی ستەمی سیاسی و کۆمەڵایەتیان بڕیوە و مێووی ئاشتیانەی پێکەوە ژیانیان تۆمار کردوە”.
ئاماژهی بهوهشكرد، یەکگرتو، پێکهاتەکان وەک بەشێک لە جوانییەکانی وڵات دەبینێت، دور لە هەر گرێیەکی حزبی و تێڕوانینی توندی نەتەوەیی و سیاسی، لە کەرکوک و شاری تریش، تورکمان هەن و بەشێکن لە نەسیجی کۆمەڵایەتی کۆمەڵگای کوردستانی و عێراقی، ئیتر چۆن دەکرێت ئەو نەسیجە خواکردە، مرۆڤ هەوڵی هەڵوەشاندنەوەی بدات.
له كۆبونهوهكهدا ئەرشەد ساڵحی رایگەیاند، “رێز و پێزانینمان هەیە بۆ دیدگای یەکگرتو، هەم بۆ روئیای سیاسی هەم روئیای کۆمەڵایەتی کە دڵسۆزانە لە واقعدا پیادەی دەکات”.
لهراگهیهندراوهكهدا هاتوه، سەبارەت بە دۆخی سیاسی عێراق، هەردولا بۆچونیان وابو کە تەوافوق دەرگا داخراوەکان دەکاتەوە و وڵاتیش لە مەترسییەکان رزگار دەکات.
