فالح حەسەن خەزعەلی ئەندامی پەرلەمانی عیراق لە نامەیەكدا بۆ مستەفا كازمی سەرۆك وەزیران نوسیویەتی، هەرێمی كوردستان لە16%ی نەوتەكەی بە ئیسرائیل دەفرۆشێت بە نرخێكی كەمتر و یاخیبووە لە رێكارەكان، بۆیە داوای گرتنەبەری رێكاری پێویست دەكات.
فالح حەسەن خەزعەلی نامەیەكی ئاراستەی مستەفا كازمی سەرۆك وەزیرانی عیراق كردوە و تێیدا نوسیویەتی، هەرێمی كوردستان بڕیارەكەی دادگای فیدراڵی پشتگوێخستووە و لە رێكارەكانی وەزارەتی نەوت یاخیبووە.
بەپێی وتەكانی ئەو پەرلەمانتارە، هەرێم نەوت بە 11 دۆلار كەمتر لەنرخی جیهانی دەفرۆشێت و ئەمەش بەهەدەردانی سامانی نیشتیمانییە، لە 16%ی نەوتەكەشی بەئیسرائیل دەفرۆشێت و ئەمەش جۆرێكە لە جۆرەكانی دروستكردنی پەیوەندی.
خەزعەلی لە بەشێكی تری نامەكەیدا داوا دەكات، رێكاری دادپەروەرانە بگیرێتەبەر بۆ جێبەجێكردنی یاسا و ئەو دۆسیە تێكەڵ نەكرێت بە ناكۆكی و شایستە و موزایەدەی دەستكەوتی سیاسی، لە رێگەی رێكارەكانتان متمانە بدرێتە خەڵكی عیراق و ناوەڕاست و باشور و پارێزگا بەرهەمهێنەرەكانی نەوت.
