شاخەوان عەبدوڵڵا جێگری دووەمی سەرۆكی پەرلەمانی عیراق دەڵێت، چەند تێبینییەكیان لەسەر ماددەكانی یاسای ئاسایشی خۆراك هەیە، چونكە دەرگای خەرجكردنی ناپێویستی لەخۆگرتووە.
شاخەوان عەبدوڵڵا لە راگەیەندراوێكدا ئاماژەی بەوەداوە، چەند تێبینیەكیان لەسەر پێشنیازی یاسای پشتیوانی خێرا بۆ ئاسایشی خۆراك و گەشەپێدان هەیە، بە دەقی ژمارەیەك لەماددەكانی یاساكە نییە بەهۆی ئەوەی دەرگای خەرجكردنی ناپێویستی لەخۆگرتووە، ئەمەش مەترسی گومانی گەندەڵی و بەفیڕۆدانی پارەی گشتی زیاتر دەكات.
وتوشیەتی، لەگەڵ دەركردنی یاسای پشتیوانی خێرا بۆ ئاسایشی خۆراك و گەشەپێدان نین بەم شێوازەی ئێستای، پەرلەمان لەم هەلومەرجە هەستیارەدا لەبەردەم بەرپرسیارێتییەكی گەورەدایە بەرامبەر بەم یاسایە، پێویستە ئەولەویەتەكان دیاری بكرێت و دەرگاكان بەڕووی گەندەڵیدا دابخرێن.
جێگری دووەمی سەرۆكی پەرلەمانی عیراق جەختی لەوەش كردووەتەوە، هەوڵدەدەن پێشنیاری یاساكە و پەسەندكردنی ئاراستە بكەن بەرەو ئەم ئەولەویەتانە، كە لە پێش هەموویان بریتین لە، دابینكردنی بڕگەكانی ناو فۆڕمی خۆراك و دابینكردنی خزمەتگوزارییە بنەڕەتییەكان و پشتیوانی كەرتی كشتوكاڵ و خەرجكردنی شایستە داراییەكانی جوتیاران و جێبەجێكردنی داواكاری وانەبێژانی خۆبەخش، خاوەن گرێبەستەكان كە خزمەتەكەیان لە دووساڵ زیاترە دابمەزرێن، هەروەها دارایی پێویست تەرخان بكرێت بۆ چاودێری كۆمەڵایەتی بەتایبەتی ئەوانەی شایستەن و لە توێژە هەژار و زیانلێكەوتووەكانن.
