ئەنجومەنی نوێنەرانی عیراق بەئامادەبونی 273 ئەندام كۆبۆوە بۆ دەنگدان لەسەر یاسای پاڵپشتی بە پەلە بۆ ئاسایشی خۆراك.
پاش گفتوگۆ كۆی یاساكە خرایە دەنگدانەوەو پەسەند كرا كە پێشتر چەند بڕگەیەكی گۆڕانكاری تیادا كرابوو.
لەپاش پەسەندكردنی یاساكە حاكم زاملی جێگری سەرۆكی ئەنجومەنی نوێنەرانی عیراق راگەیاند: پەسەندكردنی ئەم پرۆژەیە دەستكەوتێكی گەورەو سەركەوتنە بۆ بەدەستهێنانی مافی هەژارەكان و چینە پەراوێزخراوەكان و ئەوانی تر.
تەئكیدشیكردەوە، لیژنە پەیوەندیدارەكان چاودێری میكانیزمی خەرجكردنی ئەو بڕە پارەیە دەكەن كە تەرخانكراوە، ئامانجی ئەم یاسایە پشیوانیكردنی چینی هەژارە كە رەنگیداوەتەوە لەناو فۆڕمی خۆراك و زیادكردنی موچەی تۆڕی پاراستنی كۆمەڵایەتی كە ژمارەیەكی زۆر لە هاووڵاتیان سودمەند دەبن لێی، جگە لەوەی كەرتە خزمەتگوزارییەكانی تری حكومەت سودی لێدەبینن.
پاشان موقتەدا سەدر سەرۆكی رەوتی سەدر بڵاویكردەوە، پەسەندكردنی یاساكە سەركەوتنێكی ترە بۆ چاكسازی، بۆ هەموو لایەكیش رونبۆوە كە پەرلەمانی عیراق هێندە بەهێزە كە لەساڵەكانی تردا وێنەی نەبوە.
