مستەفا كازمی سەرۆك وەزیرانی عیراق داوای لەهێزە سیاسییەكانی عیراق كرد لێپرسراوێتی هەڵگرن بەرامبەر بە گەل و نیشتمان.
مستەفا كازمی سەرۆكی ئەنجومەنی وەزیرانی عیراق سەرپەرشتی كۆبونەوەی هەفتانەی ئەنجومەنی وەزیرانی كردو سەرەتای كۆبونەكە كەوتنی موسڵ و كۆنترۆڵكردنی لەلایەن چەكدارانی داعشی بەبیر هێناوەتەوەو رایگەیاندوە، لە رۆژێكی وەكو ئەمڕۆدا بوو موسڵ كەوتە دەست چەكدارانی داعش، داوادەكەم بیر لەو ساتە بكەنەوەو بزانن هۆكارەكەی چیبو بۆئەوەی دوربكەوینەوە لەو روداوەی هەشت ساڵ پێش ئێستا رویدا.
راشیگەیاندوە، ئەمڕۆ بیردەكەینەوە لەئێستاو داهاتومان كە لە ساڵانی رابردوودا چیمان بەسەرهاتوە، بۆیە بەهەموو توانایەك كاردەكەین لەپێناوی داهاتوی نەوەكانماندا.
كازمی وتوشیەتی: هێزەكانمان ئامادەن بۆ بەرگری لە عیراق و عیراقییەكان، بەڵام دەستوەردان ناكەین لە گفتوگۆی سیاسی و پێویستە لەسەر هێزە سیاسییەكان لێپرسراوێتی بەرامبەر گەل و نیشتمان هەڵگرن.
لەبارەی كاروباری حكومەتیشەوە سەرۆك وەزیرانی عیراق ئاماژەی كردوە، حكومەت بەخراپترین دۆخدا تێدەپەڕێت، بەڵام توانیومانە سەركەوتوبین، هەروەها هەیە هەوڵدەدات لە رێگەی تۆڕە كۆمەڵایەتییەكانەوە هانی توندوتیژی و ئاژاوە بدات و هەندێكی تر راگەیاندنی قۆستۆتەوە بۆ بانگەشەی توندوتژی و زیانگەیاندن بە بەرژەوەندی گشتی و هاووڵاتیان، ئەوە قبوڵكراو نییەو دەكەوێتە ژێر لێپرسینەوەی یاساییەوە.
لەبەشێكی تردا كازمی وتویەتی، حكومەت پێویستی بەبودجەو سەقامگیری هەیە تا بەپرۆژەكانی خزمەت بكات و سەقامگیری ژیان بۆ هاووڵاتییەكانی دابین بكات.
