بەڕێوەبەری نەخۆشخانەی شەهید دكتۆر هێمن (جمهوری) لەشاری سلێمانی هۆشداری دەداتە هاووڵاتیان كە شەپۆلی سكچون و رشانەوە لەسلێمانی توندەو پێویستە خۆیان بپارێزن.
داهات حوێزی بەڕێوەبەری نەخۆشخانەی جمهوری لە شاری سلێمانی بڵاویكردۆتەوە، شەپۆلێكی سەختی سكچون و رشانەوە سلێمانی داگیركردوەو تەنها رۆژی چوارشەممە 15-6 زیاتر لە 80 نەخۆشی سكچون و رشانەوە لەنەخۆشانەكەیان خەوێنراون.
ئاماژەشی كردوە، زۆرێك لە نەخۆشەكان بەهۆی توندی حاڵەتەكان توشی سستبونی گورچیلەو تێكچونی كانزاكان بون،
تكامانوایە هاووڵاتیان خۆیان بەدوربگرن لە خواردنی ناتەندروست و لەكاتی سكچون و رشانەوەدا ئاو و شلەمەنی و شتی سوك زۆر بخۆن، خۆیان بەدوربگرن لەهیلاكبون و گەرمابونی زۆر.
داهات حوێزی رێنمایی كەسانی بەتەمەن و ئەوانەشی نەخۆشی درێژخایەنیان هەیە بەتایبەتی نەخۆشی گورچیلەو فشاری خوێن و شەكرە كە پێویسە زوو چارەسەری تایبەت وەربگرن و لەكاتی توندبونی حاڵەتەكان سەردانی نەخۆشخانەكان بكەن.
بەڕێوەبەری نەخۆشخانەی جمهوری لەشاری سلێمانی راشیگەیاندوە كە چاوەڕێی ئەنجامی پشكنینەكانن بۆ دڵنیا بون لە پەتای كۆلێرا.
جێی ئاماژەیە سەباح نەسرەدین بەڕێوەبەری گشتی تەندروستی سلێمانی رایگەیاند: گومانی بڵاوبونەوەی نەخۆشی كۆلێرا لەسلێمانی دەكەن چونكە نیشانەی حاڵەتەكان هەمان نیشانەی نەخۆشییەكەن، بەڵام تائێستا ئەنجامی پشكنینەكان دەرنەچون كە یەكلایی بكەنەوە پەتای كۆلێرایە یاخود نەخۆشیەكی تر.